Á tali í Tallinn

Tallinn Helsinki Reykjavik Tallinn (med millilendingu i Koben og Stokkholmi)

2008-02-09T07:17:00.000-08:00

Nú eru liðnar tvær fyrstu vikurnar á önninni og allt komið í gang aftur eftir nokkuð langt jólafrí. Reyndar var þetta bara fyrsta vikan sem ég mæti í skólann því ég fór til íslands og skrópaði fyrstu dagana skólanum.

Það var ótrúlega fínt að kíkja aðeins heim á klakann þó svo að tilefni ferðarinnar hafi nú ekki verið af gleðilegum toga. Ég fór nefninlega til að mæta í jarðarför Gunnars Rósmundssonar, sem var mér alltaf mjög góður og því fannst mér sjálfsagt að fljúga heim til að kveðja hann.
Fyrst ég var að fara til Íslands yfir höfuð fannst mér náttúrulega ekkert vit í öðru en að stoppa aðeins og sjá hvers ég er búinn að sakna. Ég hef átt það til að sakna veðráttunnar heima (nei, ég er ekki geðveikur!). Veturinn hérna er búinn að vera frekar einsleitur, yfirleitt grár himinn og lítill snjór. Hitastigið yfirleitt ca. +6 - 7 gráður og rakt loft. Vantar alla fjölbreytni í þetta, og hana fékk ég heldur betur á Íslandi! Veðrið var klikkað og miðað við fréttirnar í blöðunum í dag hefur það bara versnað. Almennilegt!
Þetta er nú farið að skána hérna reyndar, greinilega farið að birta aðeins og síðustu daga hefur bara verið svolítið vor í lofti. Reyndar er búinn að vera óeðlilega mildur vetur hérna í ár. Venjulega ætti að vera ca. -20 stig á þessum árstíma, en nei, kalda loftið fór frekar til íslands í ár. Ótrúlegt hvað ísland er orðið vinsælt!

Hér má sjá týpísk Tallinn hús, í týpísku vetrarveðri.

Svo var það nú fleira sem ég gat gert heima á fróni t.d. fá kvef, hitta vini og fjölskyldu og bara slappa af. Ég náði náttúrulega ekkert að hitta alla sem ég vildi hitta, en það bíður bara betri tíma.

Svo flaug ég hingað á föstudaginn í síðustu viku, hitti gamla tónheyrnarkennarann minn á flugvellinum og skemmtilega listnema úr Iðnskólanum ásamt kennara sínum á leið til Finnlands í námsferð. Þannig að ferðalagið var fínt.
Þessi kennari úr Iðnskólanum hafði kennt Sóley þegar hún var þar og var að sjálfsögðu ekki lengi að tengja við hverra manna ég væri. Skemmtilegur siður hjá Íslendingum að spyrja hverra manna maður er og tengja svo saman.

Þegar heim var komið þótti ekki ástæða til að slappa af heldur var farið beint í partí! Hér má sjá nokkrar myndir. Myndavélin er semsagt komin aftur úr viðgerð þannig að við getum farið að birta glænýjar myndir aftur.

Margit og Kärt héldu uppi stuðinu.

Ég á spjalli við Tõnis sem er kærasti Margit og gítarleikari indie hljómsveitarinar Pia Fraus. Hann "heldur utan um" mynd af Eistneskum poppara sem heitir Tõnis Mägi, eitt af hans vinsælustu lögum heitir Soley, Soley.

Sóley notaði tækifærið þegar ég fór til íslands og fór til Helsinki að heimsækja tvo gamla skólafélaga úr LHÍ. Við fórum semsagt saman þangað snemma morguns, skoðuðum bæinn og hittum fólk, svo var ég farinn seinnipartinn áfram út á flugvöll en sóley varð eftir yfir helgina.
Hún kom svo heim með nýtt borð í stofuna frá Helsinki. Þeir mega eiga það finnarnir að vera miklir smekkmenn þegar kemur að hönnun. Miðbær Helsinki er meira og minna fullur af búðum sem selja finnska hönnun, og eru óhræddir við að verðleggja nokkuð hátt.
Við íslendingar megum alveg taka okkur þá til fyrirmyndar í þessum málum. Markaðsetja það sem við eigum í stað þess að kappkosta að geta boðið útlendingum upp á sama mat, sömu föt og sömu húsgögn og þeir eiga að venjast heima hjá sér.

Annars er bara ótrúlega gaman hjá okkur hérna. Erum búin að kynnast þónokkuð af nýju fólki og ... já, hvað getur maður sagt? Allt gott bara!

Hér fyrir neðan eru myndir sem Sóley tók í dag af húsum hér í borginni. Fannst skemmtilegt að setja inn myndir af einhverju öðru en þessum venjulegu úr gamla bænum. Tallinn á sér merkilega sögu og það má lesa hana í gegnum byggingarnar.

Vinkona okkar á íbúð í þessu húsi. Held að þetta sé uppáhalds húsið mitt í Tallinn. Þetta er gömul pappírsverksmiðja sem var breytt á svona skemmtilegann hátt. Frábærlega unnið með gamla og nýja tímann saman. Hluti af verksmiðjunni stendur svo ennþá tómur. Útsýnið frá svölunum hennar æðislegt.

Gamla góða Sovétblokkin.

Á Sovét tímanum áttu bara allir að vinna í verksmiðjum, svo einfalt var það. Þannig að í dag er hellingur af gömlum verksmiðjuhúsum sem bíða örlaga sinna. Á að gera þetta upp, eða bara rífa niður?
Í miðbænum er gamalt verksmiðjuhverfi sem verið að koma í not aftur. Ekki þá sem verksmiðjur heldur verslanir og ýmsa þjónustu. Gömlu húsin standa ennþá og eru bara gerð upp, og svo byggð ný inn á milli. Þetta er gott dæmi um hvað er hægt að gera vel upp gömul "ónýt" hús.

Januar

2008-01-17T13:03:00.000-08:00

Jæja, jólin búin og janúar komin, hér er allt að fara rólega af stað ég er byrjuð í einum kúrs og er að reyna að skrifa heimspekiritgerð. Það byrjar síðan allt fyrir alvöru í lok janúar. En það er ósköp notalegt að hefja árið svona rólega svo ég kvarta ekki. Ég fór í sund í fyrsta skiptið hérna í Tallinn, hérna á móti húsinu okkar er Hótel Olümpia á 23 hæð er svona lítil heilsuræktarstöð með pínulítillri sundlaug og sauna með útsyni yfir alla borgina. Það var rosa fínt jafnvel þótt að sundlaugin væri köld af íslenskum standard. Hún Laura (eistnenska vinkona mín sem ég fór með) með sagði eins og eistlendingum er lagið að hún kynni sérstaklega við þennan stað vegna þess að þar væri jafnan mjög fámennt. Eistlendingar kunna nefninlega best við sig þar sem er rólegt og fámennt. En ég er ekki frá því að ég sé samála henni. Ég og Palli höfum komið okkur innundir hjá hópi kvikmyndaáhugafólks hér í Tallinn sem hittist einu sinni í viku hér í nágrenninu í heimahúsi til að horfa á kvikmyndir. Það er mjög töff myndvarpi og allt. Það eru alltaf tekin fyrir ákveðin leikstjóri, og farið í gegnum myndirnar hans. Þau 2 skipti sem ég hef mætt var verið að taka fyrir bíómyndir Verner Herzog ef einhver kannast við hann, hann hefur gert bæði heimildarmyndir og leiknar myndir.

æi já... og myndavélin er biluð svo engar myndir í dag en vonandi næst

Jolin ad koma

2007-12-23T09:35:00.001-08:00

Það er ekki hægt að segja að það hafi verið mikið jólastress á þessum bæ upp á síðkastið. Við keyptum svo til allar jólagjafirnar í einum rykk í byrjun mánaðarins og sendum þær fyrir ca. 2 vikum síðan.
Það var reyndar orðið svolítið krítískt með jólagjafirnar okkar, en þær komu ekki fyrr hingað fyrr en í gær, eða megnið af þeim. Eithvað er enn á leiðinni en það er borinn út póstur á morgun, við sjáum hvað setur, stressum okkur ekki mikið á því.

Skólinn hjá okkur var ekki búinn fyrr en nú rétt fyrir helgi. Síðan þá höfum við verið svolítið á röltinu að skoða jólastemmninguna, kaupa í matinn (peking önd verður það þetta árið) og einnig sitthvað fyrir heimilið. Settum punktinn yfir i-ið áðan þegar við fórum og keyptum fullfermi af brennivið í arininn.

Jólageðveikin virðist nú ekki vera alveg jafn mikil hérna og heima, en þónokkur engu að síður. Það má alveg hafa það í huga að allt jólahald var bannað hér í bæ þangað til 1991. Fólk stalst víst til að halda jól fyrir krakkana með dregið fyrir gluggana:)
Ímyndið ykkur að banna jólin! Það er einhver mesta illska sem ég veit, eða þannig... það var svosem margt verra en það sem viðhafðist hér "in soviet times" (mjög algengt að þegar fólk talar um gamla tímann þá vísa þau til hans með þessu orðalagi).

Annars kom vinkona okkar í mat til okkar í gærkvöldi og svo fórum við að hitta Eistnesk/Rússneska stelpu áðan sem er au pair á íslandi. Hún hafði samband við mig á netinu og í vetur höfum við spjallað saman þar af og til. Það var mjög gaman að hitta hana. Hún var svo góð að koma með eintak af mogganum og Grapevine handa okkur. Svo stendur til að hitta fleira fólk yfir hátíðirnar þannig að við ættum að hafa eithvað fyrir stafni á næstu dögum.

Hér eru nokkrar myndir sem við tókum á röltinu í dag, það var náttúrulega komið myrkur seinni partinn. Skammdegið hér er svipað og á íslandi. Ég set kanski inn meira af jólamyndum þegar þær verða til.

Þetta er tekið á Raekoja Platz, á jólamarkaðnum. Búið er að setja fullt af litlum kofum þar sem seldur er alls kyns Eistneskur varningur, matur og glögg.

Það er endalaust selt af handavinnudót hérna, bæði fatnaði og heimilisáhöldum.

Mikið af þröngum og fallegum götum í gamla bænum.

Þarna var búið að kveika eld úti á götu til að ylja sér við. Þeir eru soldið fyrir þetta Eistarnir, að höggva við og kveikja eld, enda mikið skóglendi hér.

Tilvonandi jólamatur...??

Nokkur ord fra arkitektanema

2007-12-20T02:10:00.000-08:00

jæja jæja núna er fyrsta önn á enda og í því tilefni við hæfi að líta um öxl og horfa yfir farin veg með smá umfjöllun. Ég er búinn að vera í 13 fögum í vetur, hér er mikil áhersla á að læra mikið og fá lítið af einingum í staðinn. Engu að síður er þetta búið að vera mjög áhugavert og gaman, og sökum tungumálaörðuleika hef ég þurft að koma mér í gegn um þessa kúrsa með mismunandi hætti sem þýðir að ég er búinn að gera mikið af ritgerðum og mikið af sjálfstæðri uppýsingaleit og lestri.
Kúrsarnir sem ég var í voru meðal annars;

Umhverfisvernd - lokið með 16 blaðsíðna heimaprófi um "Bisphere" og "ecosystems" úúff!!!

3DLAB - verkefnið var að búa til háhýsi i "nýju formi",

loftræsting

vatnslögn

Urban action lectures - Fyrirlestraröð um málefni í borgarskiplagi

strategic urban planning

teikning - anatomia dýra

málun

"architectural teoria" frá Vítróvíusi til átjándu öld

vinnustofa um sköpunargáfu og vísindi

vinnustofa um "the european urban space"

Eistnesk listasaga

og svo að sjálfsögðu PALDISKI !! sem var hópverkefni, verkefnið var að þróa skipulag fyrir lítin bæ sem var herstöð hér áður fyrr. Verkefnið var mjög mikið á "jörðinni" og ekki mikið pláss fyrir klikkaðar hugmyndir, en engu að síður rættist ágætlega úr þessu. Okkar verkefni var meira að segja með iðnaðarhverfi. Við höldum svo áfram að þróa þessar hugmyndir eftir áramót.

Hér sjáið þið myndir af lokayfirferðinni og það má bæta við að hópurinn minn fékk A í einkunn!!!!

Hér er hópurinn minn að kynna "masterplanið".

Nemendur og kennarar fylgjast áhugasöm með.

Fjör á framabraut.

Hér eru myndir frá árlegri arkitektanemaveislu í skólanum. Það var mjög gaman, ræður, skemmtiatriði, kebab og vodki auðvitað til að skola niður rauðvíninu, hahahaha.

Þessi önn er búinn að vera ólík LHÍ að mörgu leiti en mjög lærdómsrík og gaman og ég hlakka til að hefja nám að nýju eftir áramót.

Meira Berlin

2007-11-25T10:38:00.000-08:00

Það var svo mikið tekið af myndum í Berlín að ég ákvað að gera aðra færslu með fleiri myndum. Fyrri Berlínarfærslan er semsagt fyrir neðan þessa, þar er meiri texti með ferðasögunni.

Þið getið stækkað myndirnar með því að tvíklikka.

Hér erum við á hamborgarabúllu sem heitir 60´s á Oranienbürgerstrasse (minnir mig). Svona rokk og ról þema.

Þetta er ég eftir að hafa fengið mér köku og kaffi í nýlistasafninu. Safnið er hannað af Mies Van Der Rohe og opnað 1968. Mjög falleg bygging, fleiri myndir hér!

Talandi um arkítekúr, þetta er bara málið.

Lestarstöðin og sjónvarpsturninn á Alexanderplatz.

Rákumst á þetta fiskabúr við dýragarðinn.

Potzdamerplatz er þess virði að kíkja á.

Þetta hús er rétt hjá Potsdamerplatz og mér finnst það með eindæmum flott.

Eftirpartí á Saks einhversstaðar í V-Berlín. Eins og sjá má var þetta bara gæfulegt.

Hnetur af tréi nágrannans borðaðar.

Sóley og Þór bregða á leik.

Mannlíf í Mitte.

Heimsókn í sendiráðið.

Berlín

2007-11-21T03:02:00.000-08:00

Já, ég veit, ég veit... ég var búinn að lofa miklu og góðu bloggi en svo liðinn ég veit ekki hvað langur tími síðan ég bloggaði síðast. En örvæntið ekki, þetta á sér eðlilegar orsakir, það er einfaldlega svo mikið að gera hjá okkur. Já, það er bara allt á fullu.

Sóley er í skólanum heilu dagana og lærir svo fram á kvöld, og það er farið að styttast í deadline hjá mér (eða ég hélt það þangað til mér var sagt í gær að kórinn sem átti að flytja verk eftir mig núna í desember baðst vægðar vegna anna og mun flytja það í febrúar). En það er bara besta mál, ég er búinn með eitt stykki kórverk samið upp úr ca. fyrsta fjórðungi "Gunnarshólma" eftir afmælisbarnið Jónas Hallgrímsson. Ljóðið er svo fjandi langt að ég ákvað að byrja bara á þessu og sjá svo til hvort ég klári það síðar. Ef þetta kemur vel út á tónleikunum má búast við framhaldi... svipað eins og með hollívúdd myndirnar, ef sú fyrsta meikar það, þá kemur nr. 2 svo 3 o.s.fr.v.... haha:)

En þrátt fyrir annir, þá hikum við ekki við að vera kærulaus líka (við erum fullorðin, við megum það!) og skelltum okkur til Berlínar um daginn að heimsækja Þóru, systur mína og familíu. Tilgangurinn var reyndar tvíþættur, því við vorum líka á leiðinni til að sjá Arcade Fire - eina af uppáhaldshljómsveitum okkar. Meira um það síðar.

Það var æðislegt að koma aftur til Berlínar eftir 7 ára fjarveru. Borgin hefur breyst þónokkuð mikið á þessum tíma á sumum stöðum meðan aðrir staðir eru eins og þegar við vorum þar síðast.

Fjörið byrjaði um leið og við lentum þegar við vorum drifin beint í sendiráðið á tónleika þar sem flutt voru sönglög Atla Heimis við ljóð áðurnefnds Jónasar Hallgrímssonar (he´s so hot right now...!). Það var mjög gaman og við hittum þar fólk sem við þekkjum frá Íslandi og að sjálfsögðu var farið í eftirpartí. Þar sem Íslendingar eru samankomnir, þar er eftirpartí!

Okkur var boðið að koma í heimsókn í sendiráðið daginn eftir til að fá "guided tour" til að sjá bygginguna, en hún er nefninlega hönnuð af PK. Arkítektum, stofunni sem Sóley var að vinna á. Mjög gaman að fá svona gestrisni, takk fyrir okkur.
Sama dag röltum við um þetta sama hverfi og skoðunum arkítektúrinn á sendiráðunum þarna í kringum.

Svo var náttúrulega kíkt á Potsdamer Platz, farið þaðan yfir í Mitte sem er austan megin og bara göturnar mældar.

Um kvöldið var komið að því að fara á Arcade Fire. Tónleikarnir voru stórkostlegir, ekkert minna. Aracde Fire er án efa eitt besta band sem hægt er að sjá í dag. Þetta var í ca. 2000 til 2500 manna sal í Kreutzberg, "Kolumbiahalle". Við vorum uppi á svölum þar sem við sáum yfir sviðið og áhorfendurna, það var sérstaklega gaman að horfa yfir áhorfendaskarann og hvernig hljómsveitin dáleiddi fólk frá fyrsta lagi.
Það er gefandi að sjá hljómsveit spila sem hefur yfir svona mikilli orku að búa, og kemur henni yfir til áhorfendanna í gegnum lögin með mögnuðum flutningi sínum. Einn þeirra helsti styrkur liggur í gríðarlega flottum laglínum, mun dýpri og fallegri en almennt heyrist á rokktónleikum.
Þar sem við tókum engar myndir á tónleikunum þá skelli ég hér inn link frá Jules Holland, honum er vonandi alveg sama.

Daginn eftir var kíkt í nýlistasafnið, aðallega til að tékka á arkítektúrnum sem var frábær. Þvínæst kíkt á gyðinga-memorial reitinn rétt á hjá Brandenborgarhliðinu, í miðborg Berlínar... klikkuð stemmning. Voða flott, en soldið spes allt saman...

Um kvöldið fórum við í afmæli með Þóru og Kristjáni til vina þeirra.

Laugardagurinn var tekinn í að labba um Mitte svæðið og mæla út búðir og veitingastaði. Við komust að þeirri niðurstöðu að gömlu Sovét blokkirnar á Alexanderplatz væru fallegasti hluti Berlínar, austrið greinilega búið að skjóta rótum í hjörtum okkar:)

Í svona stórri borg eyðir maður ansi miklum tíma í samgöngur, soldið skrítið fyrir Íslendinga sem eru vanir að komast frá A til B á 5 mínútum.

Sóley og Þór tóku leik í billjard. Drengurinn er efnilegur!

Það fór vel um okkur í eldhúsinu hjá Þóru.

Þessi ferð var alveg frábær, og það má gera fastlega ráð fyrir að við munum sjást meira þarna á næstunni. Notum tækifærið og þökkum Þóru, Kristjáni, Löru og Þór fyrir gestrisnina.

Heimsoknartimi

2007-10-22T11:58:00.000-07:00

Það hefur verið meira um gestagang en venjulega hjá okkur upp á síðkastið. Um síðustu helgi kom pabbi Sóleyjar með hele familien frá Danmörku yfir helgina og svo komu mamma og pabbi og voru frá mánudegi til laugardags. Þetta var afskaplega hressandi og gaman að sjá alla, og geta loksins sýnt nýja heimabæinn.
Það er nefninlega svolítið skrítinn tilfinning að búa hérna í þessari fallegu borg og geta ekki sýnt öllum vinum og vandamönnum það sem fyrir augu ber í okkar daglega lífi, og því var það einstaklega skemmtilegt að geta brugðið sér í hlutverk leiðsögumannsins og rölt með fólkið á milli staða.... "... og hér sjáum við rússnesku kirkjuna... ...og á hægri hönd sjáum við virkisvegginn..." þið náið hvert ég er að fara:)

Mamma og pabbi komu líka með ísland með sér (súkkulaði, lakkrís, lýsi, flatkökur + hangikjet og náttúrulega.... íslenskt brennivín!) já, það er ekkert mál að fara frá íslandi, maður getur tekið það með sér!.. eða þannig... Það var allavega mjög gaman að fá þau öll í heimsókn og ég auglýsi hér með að við þykjum mjög góðir gestgjafar og gistiaðstaða hjá okkur til fyrirmyndar.

En það var fleira í gangi en heimsóknir. Á meðan vinir mínir á íslandi djömmuðu af sér ra****tið á ariwaves hátíðinni var líka tónlistarhátíð í gangi hér: "Nyyd festiaval" (nú hátíðin) þar sem var flutt tónlist eftir eistnesk tónskáld og erlend. Þarna heyrði ég m.a nokkur verk eftir Ligeti, heiðurstónskáld hátíðarinnar, (þið kannist við tónlistina úr myndum Stanley Kubrik 2001, Shining o.s.fr.v.), Arvo Pärt Erkki-Sven Tüür og tónsmíðakennarann minn Helenu Tulve. Voða fínt allt saman. Ég verð að nefna það enn einu sinni að tónlistarlífið hér er alveg magnað, svo mikið framboð af svo áhugaverðri tónlist.

Við fengum loksins í pósti kassana okkar frá íslandi, þeir höfðu verið forever á leiðinni og skriffinnskan sem fylgdi því að fá þá var alveg merkileg. Nenni ekki að fara nánar út í það. En það er ótrúlegt hvað það er gaman að fá "dótið sitt" aftur, þó þetta sé í sjálfu sér ekkert svo merkilegir hlutir. Það gerir heimilið "heimilislegra" að hafa þar hluti sem manni þykir vænt um.

Framundan er svo skóli og meiri skóli, en svo ætlum við að fara eftir ca. 3 vikur til berlínar og heimsækja Þóru, systur mína, og fjölskyldu ásamt því að sjá tónleika með Arcade Fire. JESS!!

Daglegt lif

2007-10-01T12:34:00.000-07:00

Nú er lífið dottið í fastar skorður hjá okkur, bæði komin á fullt í skólanum og ekki gefist mikill tími til bloggskrifa. Við höfum reyndar líka verið frekar dugleg við að "bregða undir okkur betri fætinum" og kíkja út á menningarlífið í Tallinn.

Þegar Sóley átti afmæli um daginn fórum við út að borða á Georgískum veitingastað, við höfum nefninlega komist að því að Georgískur matur er alveg einstaklega góður. Dæmigerður Georgískur matur er sashlik (stafað ca. svona), það er kjöt grillað yfir eldi og vafið inn í þunnt brauð, ekki ósvipað burritos í útliti. Svo er náttúrlega eitthvað spes krydd. Voða gott allt saman.
Að því loknu fórum við á tónleika í gamalli kirkju hérna (nóg af þeim) á tónleika þar sem flutt var Eistnesk kóratónlist af Fílaharmóníukammerkór Eistlands undir stjórn Paul Hillier (voða frægur sko...).

Svo fórum við líka í bíó um daginn á nýjasta hittarann hér í landi "Sügisball" (haustball). Íslendingar hafa nú löngum verið þekktir fyrir að gera nokkuð þunglyndar myndir en þurfa heldur betur að hugsa sitt ráð ef þeir ætla að vinna Eista í þunglyndiskeppninni, þetta var rosalegt! Þessi mynd gerir víst reyndar skemmtilega grín að þunglyndinu sem hefur einkennt Eistneska kvikmyndagerð hingað til, tók okkur smá tíma að fatta að sumir hlutir í myndinni voru brandarar sem Eistar skildu mjög vel meðan við veltum fyrir okkur "af hverju eru allir að hlæja...?" Mæli eindregið með þessu:)

Ég hef verið frekar duglegur að sækja tónleika hér, það er nefninlega hellingur í boði fyrir svona "uppgjafa-rokkara gone classical" gæja eins og mig;) Fór á Jóhannesarpassíuna eftir Sofiu Gubaydulina sem er eitt frægasta núlifandi tónskáld Rússa. Hún er 76 ára gömul og mætti eldhress á tónleikana. Daginn eftir fór ég og hlýddi á flutning á einu af mínum uppáhaldsverkum "Da Pacem" eftir Arvo Pärt, mæli big time með þessu fyrir þá sem ekki þekkja! Ég vissi ekki að það væri verið að fara að flytja þetta verk og varð því mjög ánægður þegar ég mætti á staðinn. Einnig var þarna flutt verk eftir Gyija Kancheli og einhvern renaissance gæja sem ég man ekki hvað heitir.
Hmmm... þetta gæti orðið soldið löng upptalning... það var tónlistarhátíð í skólanum þar sem Penderecki kom og kíkti á okkur, var með spjall við nemendur og svo voru verk eftir hann flutt á tónleikum honum til heiðurs um kvöldið. Tónskáld + hljómsveit frá S-Kóreu komu líka og það var mjög skemmtilegt að fá sýnishorn af þeirra menningu.

Held ég láti þetta duga í bili með tónleikalýsingar.

Svo héldum við matarboð um daginn, fyrsta svona official matarboðið okkar hér í landi. Buðum hingað þýskum skólafélögum Sóleyjar, Eistnesku vinkonu okkar henni Margit og hún kom með Finnskan listamann með sér. Mjög fjölmenningarlegt allt saman, eða eins og við köllluðum það "very contemporary". haha.

Þetta er farið að hljóma eins og við gerum ekkert nema að skemmta okkur hérna, á það ekki annars að vera þannig...?

Læt hér fylgja myndir sem lýsa stemmningunni á okkur hér heima, svona stundum allavega:

S - Eistland

2007-09-06T01:08:00.000-07:00

Við fórum í ferðalag um helgina með vinum okkar, þeim Margit, Karin og bandarískum eiginmanni hennar, Jeff. Þannig er að Margit var fyrir nokkuð löngu síðan búin að bjóða okkur að koma með henni í sveitina þar sem amma hennar býr í S - Eistlandi og þar sem að Karin og Jeff, sem búa í NY voru bæði á landinu þótti tilvalið að fara í hópferð í sveitina.
Það var mjög skemmtilegt að sjá þennan hluta landsins sem er nokkuð ólíkur umhverfinu hér í Tallinn, svolítið eins og að vera komin einhvert aftur í tímann.
Þetta var mikið ævintýri og við náðum að gera ansi mikið á þessum stutta tíma. Við fórum m.a. í skóginn og týndum sveppi í matinn, heimsóttum nágranna sem buðu okkur í kaffi og með því, fórum í reyk-sauna og vöktum við varðeldinn frameftir nóttu.

Fyrsta regla þegar haldið skal í ferðalag: ekki leigja ódýrasta bílinn í bænum! Þessi gafst upp í miðbæ Tallinn... haha! Við hringdum og kvörtuðum og það var komið með annan í staðinn, þann næstódýrasta:)

Þarna erum við lögð af stað í "nýja" bílnum okkar og eins og sjá má þá var stemmningin ótrúleg.

Þetta var ca. 3 tíma keyrsla og gott að komast á áfangastað.

Þarna má sjá okkur á sveppaveiðum. "Veiðin" úr þessari ferð var borðuð með bestu lyst seinna um kvöldið.

Við skruppum í heimsókn til vinkonu Karin sem var stödd á næsta bæ. Þar var tekið ótrúlega vel á móti okkur með kaffi og bakkelsi.

Að heimsókn lokinni fórum í "fjallgöngu" á hæsta tind Eistlands, en hann er u.þ.b. 300 metra hár. Eins og sjá má erum við alveg uppgefin eftir að labba upp TRÖPPURNAR á hann!

Um kvöldið fórum við í reyk-sauna. Þetta er hefð sem við Íslendingar tengjum oft við Finna, en Eistar eru líka mikið sauna fólk. Fyrir þá sem ekki vita hvernig þetta virkar skal ég útskýra: Fyrst er kveiktur eldur og hann látinn deyja út, jafvel bætt á hann nokkrum sinnum brenni í millitíðinni til þess að eftir verði eldheit kol. Meðan á þessu stendur er saunan auðvitað full af reyk og ekki hægt að vera þar inni. Svo er soðið vatn. Þegar eldurinn er slokknaður (ca. 2 tímum seinna) er farið með vatnið út í saununa og þá er hægt að fara að hefja leikinn. Vatninu er svo helt á heit viðarkolin og þannig gýs upp mikill hiti. Svo er bara setið og svitnað, og hlaupið reglulega út til að kæla sig niður. Þegar nokkuð er liðið á, er góður siður að sprauta á sig, eða láta sprauta á sig ískölu vatni (á veturna er náttúrulega bara hlaupið út í snjóinn). Eftir allt þetta þvær maður sig hátt og lagt og lykar svo af reyk það sem eftir er vikunnar. Hljómar þetta ekki vel? Þó að mér hafi nú stundum fundist þetta full mikið af hinu góða, þá mæli ég eindregið með þessu fyrir alla.

Á myndinni hér að ofan má sjá okkur fá okkur að borða eftir saununa (auðvitað afrakstur sveppatýnslu dagsins).

Svo var sest við varðeldinn og hlegið fram eftir nóttu.

Hér má sjá mynd af okkur í Tartu, sjarmerandi háskólabær sunnarlega í Eistlandi þar sem við stoppuðum stutt við á leiðinni í bæinn aftur.

Í öðru fréttum er það helst að við erum flutt í íbúð í miðbænum þar sem við verðum allavega næstu tvö árin. Við erum alveg einstaklega ánægð með hana og líður vel. Við munum skella in myndum af henni fljótlega.
Svo erum við bæði nýbyrjuð í skólanum þannig að það er bara allt í gangi - meira síðar.

Sumarskoli no. 2

2007-09-03T11:20:00.000-07:00

Við erum ekki búin að vera mjög dugleg í bloggfærslum upp á síðkastið. "vandamálið" er einfaldlega að það er svo mikið að gerast hjá okkur að bloggið verður útundan. við biðjumst velvirðingar.
Síðustu tvær vikurnar er ég búinn að vera á tónsmíðanámskeiði í skólanum sem heitir "crossing borders, once again". Þetta er svona sumarskóli þar sem að fólk allstaðan að úr evrópu kemur til að læra, hljóðfæraleikarar og tónskáld. Námskeiðið endaði svo á tónleikum þar sem flutt var lítið verk eftir mig, klarínettu mineatúr - kom bara vel út.
það var skemmtileg tilviljun að tónsmíðakennarinn minn þarna var gamli kennarinn minn úr LHÍ, Dr. Úlfar Ingi Haraldsson, gaman að hitta hann aftur, en svo þegar skólinn byrjar taka aðrir kennarar við.
það var gaman að hitta þarna fólk sem er í svipuðum pælingum og maður sjálfur, en samt með ólíka sýn á viðfangsefnið. stækkar alltaf smámsaman heiminn fyrir manni.

jæja, nú fer bilið á milli bloggana hjá okkur vonandi að styttast. sýnið okkur smá þolinmæði:)

þetta er bekkurinn minn á námskeiðinu ásamt úlfari, kennaranum okkar.

Helsinki

2007-08-14T12:11:00.000-07:00

Það er búið að vera mikið flakk á okkur upp á síðkastið, því ekki nóg með að við séum nýkomin frá St. Pétursborg heldur skelltum við okkur til Helsinki núna um helgina.

Þannig er að vinkona okkar var að halda sýningu á málverkum sínum og þar sem við búum bara hinum megin við flóann þá fannst okkur alveg málið að "taka bara Akraborgina" yfir og slá tvær flugur í einu höggi; sjá borgina og sýninguna.
Þessi ferð var nú í alla staði rólegri en St. Pétursborgarferðin, kominn nokkur þreyta í okkur eftir það sem á undan var gengið og borgin svosem ekki alveg jafn framandi, þótt falleg sé.

Er ekki alger classic að byrja svona ferðablogg á mynd út um hótelgluggann? Þetta var ágætis gistiheimili í miðri borginni sem vinkona okkar hafði mælt með.

Við fórum náttúrulega beint í bæinn og þarna má sjá okkur slappa af og njóta sólarinnar liggjandi í grasinu sem er við aðalverslunargötuna í Helsinki. Setur skemmtilega afslappaðann svip á miðbæinn að hafa svona grasflöt alveg við búðirnar.

Á föstudagskvöldinu var svo sýningin sem við fórum til að sjá. Við tókum nú ekki mikið af ljósmyndum þarna inni en á þessari má sjá listakonuna Kristínu Gunlaugsdótttir og Hubert, Austurrískan kærasta hennar, á opnuninni. Kristín er ein af okkar færustu myndlistarkonum og fyrir þá sem ekki þekkja til verka hennar þá mæli ég eindregið með þeim ( http://www.kristing.is/ ).

KB banki var styrktaraðilli að sýningunni og að henni lokinni buðu þeir okkur og vinum/fjölskyldu Kristínar út að borða í tilefni dagsins
Það var bannað að taka myndir inni á veitingahúsinu, en við stálumst nú samt:) Þetta var alveg einstaklega flottur staður. Þess má geta að maturinn á myndinni er ekki eini maturinn sem okkur var boðið:) Diskarnir voru óteljandi.

Fiskimarkaðurinn er markaður við höfnina niðri í miðbæ Helsinki. Þetta er svona staður það sem er seldur allskyns matur og góðgæti, skemmtileg stemmning.

Það er alltaf eithvað að frétta af okkur og þetta blog hálfgert best-of af því sem dregur á daga okkar hér í Tallinn. Í næsta bloggi verða sennilega fréttir + myndir af nýju íbúðinni okkar!

St. Petursborg

2007-08-06T15:52:00.000-07:00

Um helgina var förinni heitið alla leið austur til St. Pétursborgar. Við fórum í rútu með fólki í skólanum okkar í skipulagða ferð þar sem að okkur var sýnd borgin og svo fengum við náttúrulega líka frítíma til að skoða hana sjálf. Ferðin var mjög vel skipulögð þar sem okkur voru sýnd þekktustu staðir en svo var líka passað upp á að við fengum líka tíma til að flakka um ein og óstudd.

ATH! Þið getið smellt á myndirnar til að stækka þær!

Við skoðuðum Petrograd, höll Keisara Péturs mikla sem ákvað að þarna skyldi rísa borg "gluggi til vestursins". Hann byggði semsagt þessa gulli skreyttu höll og nokkrar í viðbót ásamt stærsta gosbrunnagarði í heimi (hann var augljóslega snaaaaarbilaður) fyrir utan borgina meðan pöpullinn svalt heilu hungri.

Þegar við komum inn í landið var alveg nýr veruleiki sem blasti við okkur. Vegirnir voru eins og þvottabretti og húsin greinilega ekki byggð af miklum efnum.

Það hefur lengi verið draumur okkar að koma til Rússlands og sjá St. Pétursborg og þessi ferð var engin vonbrigði. Borgin er algerlega stórkostleg "metropolis". Stórfengleg er sennilega orðið sem má nota til að lýsa henni. Gulli skreyttar hallir, breiðar götur, garðar og síki sem setja mikinn svip á borgina.
Allstaðar má sjá merki um gamla tímann, styttur af Lenín og borgin er vel merkt kommúnistatjörnunni á hinum ýmsu stöðum. En það má líka sjá merki um nýja tíma og vestræn merki vel greinileg í borginni. Skemmtilegt var að sjá stórt torg á miðri Nevskiy Prospekt (breiðgata í miðri borginni) þar sem var risastór kommúnistastjarna á stalli, og beint á móti henni COCA-COLA merki! Þetta virðist vera málið í borginni, "vestræni nútíminn" búinn að ryðja sér rúms, en þetta virðist ekkert vera að blandast saman. Algerar andstæður sem þurfa mun meiri tíma til að lagast hvor að annarri.

Þarna mátti sjá verslanir með rándýrum vestrænum tískumerkjum og betlara ráfa um fyrir utan þær. Fólk á nýjum fínum bílum keyra um á milli þeirra sem voru á eldgömlum Lada Sport (djöfull eru það annars kúl bílar! hvað varð um þá í Rvk?)

Þegar kommúnisminn féll og kapítalisminn ruddi sér rúms voru margir sem græddu á tá og fingri, en hinir, sem náðu sér ekki á strik, héldu bara áfram að vera fátækir og í dag lifir ca. 1/3 hluti þjóðarinnar undir fátækramörkum (fátækramörk í Rússlandi miðast við u.þ.b. 3.300 kr. ISK)(tölur frá 2004).
En það er önnur saga.

Palli fyrir utan Finland lestarstöðina þar sem að Lenin sneri aftur úr útlegð. Inni má stjá stóra veggmynd af honum. Alveg merkilegt hvað hann er allstaðar þarna.

Um kvöldið fórum við neðanjarðarlestinni niður í bæ. Neðanjaraðarlestirnar í Pétursborg eru frægar fyrir glæsileik sinn. Við gengum niður Nevskyi Prsopekt og vorum algerlega hugfangin.
Morguninn eftir var farið í rútuferð um borgina og okkur sýndir helstu staðir og þvínæst í St. Peter and Paul kirkjuna. Hún er staðsett í miðju borgarinnar (þ.e. þar sem hún hófst). Þar sáum við kistur allra keisara Rússlands, fyrir utann einn sem er í Moskvu, og þar á meðal fannst okkur alveg hreint magnað að sjá grafir Nikulásar II og fjölskyldu hans (þar á meðal Anastasíu sem margir þekkja ævintýrið um). En þau voru öll, nema áðurnefnd Anastacia, líflátin 1918, ári eftir uppreisnina en fengu ekki greftrun fyrr en 80 árum síðar, 1998.

Það má bara ekkert þarna:)

Seinna um daginn var farið í bátsferð og siglt um síki borgarinnar.

Við skoðuðum Hermitage (Vetrarhöllina) bara að utan, ákváðum að bíða með að skoða verkin þangað til í næstu ferð.

Þessi mynd af Blóðkirkjunni er tekin út um gluggann á hótelinu okkar (með aðdráttarlinsu).

Hóelið okkar var alveg mjög töff - A la soviet style!

Þessi mynd er tekin út um gluggann hjá okkur fyrsta kvöldið.

Ég tók þessa mynd af hermönnum sem ég sá nálægt Vetrarhöllinni. Það er nokkuð algeng sjón að sjá hermenn þarna á götunum.

Sóley fyrir utan klaustur í borginni.

Síðasta daginn var farið að minnismerki um 900 daga stríðið í seinni heimsstyrjöldinni, alveg merkilega fallega kirkju sem ég man ekki nákvæmlega hvað heitir í augnablikinu, Puschkin þorpið stuttu fyrir utan borgina, og höll Katrínar miklu. Þessir keisarar vissu bara ekki hvað "less is moore" þýddi.

Palli niðri við ánna sem rennur í gegnum borgina. Borgin er stundum nefnd Feneyjar norðursins vegna síkjanna sem þar má sjá.

Þessi hressu gamalmenni voru í mðbænum veifandi skiltum þar sem þau virtust vera að lýsa skoðunum sínum á Bandaríkjunum og veifandi gamla Soviet fánanum. Gaman að þessu.

Þetta er bara stutt upptalning af því sem við upplifðum í St. Pétursborg. Þetta var alveg ótrúleg lífsreynsla sem mun aldrei gleymast og ég mæli með því fyrir alla að gera sér ferð "austur fyrir tjald" og upplifa eithvað sem er okkur Íslendingum svo fjarlægt.

Skolinn buinn

2007-08-06T14:09:00.000-07:00

Í lok síðustu viku var síðasti skóladagurinn okkar í sumarskóla. Við erum kanski ekki orðin alveg fljúgandi fær í Eistnesku ennþá, en við kunnum allavega mun meira en við gerðum fyrir 3 vikum síðan. Þetta nám var mjög praktískt og tungumálið hefur breyst úr því að hljóma eins og kínverska yfir í eithvað sem við skiljum bara ágætlega, og svo þurfum við bara að halda áfram að æfa okkur.
Við þurftum því að kveðja suma skólafélaga okkar, og það var með nokkrum trega því ágætis vinskapur hafði myndast innan hópsins. Við komum þó til með að halda sambandi okkar á milli því sum þeirra munu vera hér áfram, eða vera hér eithvað á næstunni.

Þetta erum við ásamt henni Katrínu, kennaranum okkar.

Sóley tók þessa mynd af okkur í lyftunni á leið í kaffipásu.

Viljandi

2007-08-06T07:09:00.000-07:00

Það hefur verið svo mikið að gerast hjá okkur að við höfum ekki haft við að uppfæra bloggið eins mikið og við vildum. Hér kemur smá uppdeit.
Um þarsíðustu helgi fórum við á Þjóðlagahátíðina í Viljandi. Viljandi er ca. 20.000 manna bær í ca. 200 kílómetra fjarlægð suður af Tallinn. Hátíðin stendur yfir í 4 daga, en við fórum bara í dagsferð með skólafélögum okkar.
Hátíðin er mjög vinsæl hjá Eistlendingum og um þessa helgi tvöfaldast íbúafjöldinn í Viljandi. Þarna myndast mjög falleg stemmning þar sem allir taka þátt. Mér fannst mjög gaman að sjá þarna samankomið fólk á öllum aldri, og allar týpur, til þess að hlusta á þjóðlagatónlist, ekki alveg verslunarmannahelgarstemmningin sem maður á að venjast að heiman. Svo eru tjöld þar sem er grillað kjöt og steiktar kartöflur ofan í lýðinn. Almennilegt skal það vera!
Tónleikar eru haldnir víðsvegar um miðbæinn, til að mynda í tveimur kirkjum sem eru þarna og í sölum og tjöldum sem eru reist fyrir hátíðina. Einnig eru tónleikar haldnir í gömlum kastalarústum.

Þessi kisi sat pollrólegur á öxlinni á eiganda sínum meðan hann (eigandinn sko) spilaði á nikkuna sína áhorfendum til mikillar ánægju.

Það hafði verið mjög mikið að gera hjá okkur í vikunni á undan og við eyddum mestum deginum sitjandi í grasinu að borða kjöt og drekka bjór. Mjög kærkomin hvíld. Við hlið mér er hún Satu, Finnsk/Ástralska skólasystir okkar sem fagnaði afmælinu sínu með mér.

Maturinn var mjög góður.

Sóley tók þessa mynd í bænum, þetta er skemmtilega "gamall" bær.

Við fórum á alveg frábæra tónleika um kvöldið þar sem flutt var Tyrknesk þjóðlagatónlist. Flutningurinn var alveg frábær, hljóðfæraleikararnir mjög góðir og söngvararnir (og þá sérstaklega þokkadísin hér að ofan) áttu salinn.

Hér má sjá sviðið sem er undir kastalaveggnum.

30 + 20 = 50

2007-07-27T13:04:00.000-07:00

Ég hef ekki gert mikið af því að halda stórar afmælisveislur í seinni tíð, yfirleitt bara boðið mínum nánustu í "hógværa" heimsókn. En nú eru aðstæður öðruvísi en áður og alveg tilvalið að breyta til. Það kom nefninlega í ljós nýlega að ég væri ekki einn um að eiga afmæli á næstunni, og það stórafmæli. Skólasystir mín hún Satu var nefninlega að fara að fagna 20 ára afmæli sínu, og það á sama degi og ég myndi ganga inn í þrítugsaldurinn. Þetta fannst okkur of skemmtileg tilviljun til þess að sitja hjá aðgerðarlaus, þannig að það var farið í spariskóna.
Bekkjarfélagar okkar, sem eru mjög skemmtilegt fólk, vildu endilega að við myndum öll fagna þessu saman. Leikurinn hófst með kampavíni og súkkulaði á kaffihúsi niðrí bæ sem að selur "heimagert" súkkulaði. Mjöööög gott. Þvínæst var farið heim í og slappað af fram að kvöldmat en þá hittust allir aftur niðrí bæ á sushistaðnum "SILK", svo var farið í heimahús og þvínæst út á skrallið.
Látum myndirnar tala sínu máli:

Þessar myndir ættu að fanga ágætlega stemmninguna á Chocolaterie kaffihúsinu í gamla bænum. Svona frönsk stemmning í gangi þarna.

Austurískir vinir okkar gáfu okkur þessa gjöf til að kynna okkur fyrir menningu síns heimalands...

Eftir að við höfðum borðað Sushi fórum við heim til hennar Gertrude (held það sé skrifað svona) hún hafði keypt handa okkur Sacher tertu og Síberískt Vodka til að skola henni niður með, og að sjálfsögðu var afmælissöngurinn sunginn fyrir okkur á Eistnesku.
Þarna má líka sjá Sóley og David tala saman, en fínn vinskapur hefur myndast milli okkar og hans enda eðalmaður þar á ferð.

Þetta er útsýnið út um gluggann þar sem við vorum. Turninn er á Raekoda torginu í miðbænum.

Þetta var frábær byrjun á þrítugsaldrinum, og ég vona að framhaldið standi undir væntingum!

sumarskolinn byrjaður

2007-07-22T08:28:00.000-07:00

Hæ

Nú erum við byrjuð á fullu í sumarskóla að læra Eistnesku. Fyrstu viku lokið og við erum orðin "aðeins" betri í tungumálinu en fyrir viku síðan, þetta kemur allt. Ég hafði ekki alveg áttað mig á því hvað það yrði gaman að vera í sumarskóla en þetta er alveg frábært. Fullt af fólki á öllum aldri, allstaðan að úr heiminum, samankomið til að kynnast landi, menningu og tungumáli. Bekkurinn okkar er blanda af fjórum Bandaríkjamönnum, einni stelpu sem er Áströlsk/Finnsk blanda, einum Breta og svo náttúrulega okkur. Frekar lítill bekkur, sem er þægilegt. Svo fara allir nemendur skólans saman í vettvangsferðir og á fyrirlestra seinnipart dagsins og um helgar. Þar má nefna ferð í þjóðgarð Eistlands, safn með gömlum byggingum, gönguferðir um gamla bæinn með leiðsögumanni, ferð á safn um tíma kommúnismans í Eistlandi þar sem gamall maður sagði okkur sögur af því sem hann og þjóðin hafa upplifað saman og svona gæti ég haldið áfram... Svo erum við oft á kvöldin með bekkjarfélögum okkar og förum saman út að borða og skemmta okkur.
Hér að neðan má sjá nokkrar myndir frá þessum ferðum (ath. með því að smella á myndirnar getið þið stækkað þær!):

Við lærum oft saman eftir skóla, hér erum við í einum af fjölmörgum görðum sem má finna í Tallinn.

Hér er leiðsögumaðurinn að sýna okkur eithvað merkilegt í gamla bænum, mjög hress gæji.

Þarna erum við að borða á gömlum veitingastað einhversstaðar úti í sveit. Hann leit út eins og gömul hlaða.

Og þetta erum við að njóta veðurblíðunnar og náttúrunnar.

I dyragarðinum

2007-07-15T23:40:00.000-07:00

Við skelltum okkur í dýragarðinn nú um helgina. Þar sáum við alveg helling af dýrum sem við höfðum ekki séð áður í bland við "kunnuglegri andlit". Við látum myndirar tala sínu máli (það er hægt að klikka á myndirnar til að stækka þær:)

Okkur fanst ansi fyndið þetta skilti sem er hér á neðstu myndinni. Það má lesa út úr því að það sé bannað að gefa krókódílunum börn að borða...haha.

A röltinu

2007-07-12T02:38:00.000-07:00

Síðustu dagar hafa farið í að ganga um borgina hér sjáið þið Rússnesku réttrúnaðarkirkjuna í gamlabænum (Vanalinn vana = gamalt linn= borg/bær) og á hinni myndinni sést yfir gamlabæinn og út yfir borgina.

Kaffihúsinn hér eru engu lík, það er svo mikil alúð lögð í að gera þau falleg og sjarmerandi með litlum smáatriðum eins og blómum í krukku eða rósóttum kaffibollum :)

Tallinn ekki bara "krútt" heldur líka töff ! depeche mode barinn.

Hér er mynd niðri við sjó og eitthvað stórt sovjét-mannvirki (að við höldum) sem við kunnum ekki söguna bakvið.

Hér er sporvagn sem er algengur ferðamáti hérna og svo er mynd úr dullarfullum garði sem við fórum inn í í miðri borginni. það virtist enginn hafa hirt um hann í lengri tíma og gróður óx villtur í gömlum molnuðum steintröppum. Nema hvað að það var búið að setja upp glænýja ljósastaura um allan garðinn. svo það virðist standa til að virkja hann á næstunni.

Að lokum viljum við þakka þær stórglæsilegu viðtökur sem þessi síða hefur fengið og við hvetjum alla til þess að kommenta sem mest og oftast.

Heima er best

2007-07-09T10:04:00.000-07:00

Í dag ringdi, svo við héldum okkur heima við, fyrir utan að við skruppum í ljósmyndaverslun til að fjárfesta í myndavél þar sem gamla vélin gaf upp öndina blessuð sé minning hennar. Hér eru nokkrar heimamyndir til að ná rólegheitastemmningunni sem einkenndi daginn. Það eru engar myndir utan frá þar sem við nenntum ekki út nema einu sinni. Þær verða bara að koma á morgun.

Tere Tallinn, bless Reykjavik

2007-07-08T10:42:00.000-07:00

Heil og sæl öllsömul, nú erum við flutt frá okkar ástkæra íslandi til Tallinn í Eistlandi. við erum búin að vera hérna í nokkra daga og erum farin að jafna okkur á flutningastressinu + menningarsjokkinu:)
Við lentum á flugvellinum í Tallinn þriðjudaginn 3. júlí 2007, sáum við þá í fyrsta skipti borgina sem við eigum eftir að búa í næstu árin.
Borgin er ljómandi falleg og ber merki sögunnar sem gefur henni ákveðin sjarma. Hér er mikið af gömlum, tómum bygginginn sem munað hafa fífil sinn fegurri í bland við nýuppgerð hús og nýreistar glerhallir. Hér gengur greinilega mikið á í uppbyggingunni enda eiga Eistar einhver met síðustu árin í efnahagsvexti.
Síðustu daga höfum við gengið borgina endanna á milli og skoðað það sem fyrir augu ber. Þar má nefna gamla bæinn, en hann er á heimsmynjaskrá UNESCO og alveg einstaklega fallegur fullur af frábærum kaffihúsum og veitingastöðum. Þess má geta að við erum farin að panta á eistnesku, þá helst jarðaberjaköku og latte, "uks masikaskook ja uks kovhi latte" svo við fáum okkur ansi oft þannig. Reyndar tókst okkur að biðja um ostaköku í dag juustkook !!!! við munum fara á eistneskunámskeið nú í sumar, og okkur hlakkar til að geta gert okkur skiljanleg á eistnesku.